So e scheen geschmiggder Nadelbaam, das iss werklich e imposandi Erscheinung. Wo mer schunn mool langsam in Stimmung kumme unn dann midd Recht singe kann: Oh Fichtenbaum, oh Fichtenbaum! Was joo im Spätherbschd aach e ganz scheener Anbligg war, das ware die Laabbääm im Wald. Awwer wie bei de meischde scheene Sache im Lääwe kummt es digge Enn dann hinnerher. Wie nämlich jedds die erschde heffdischere Windstees uffkumm sinn, doo sinn doch vunn de Bääm die ganze scheene Blädder abgefall. Mer sadd joo sogar umgangssprachlich, die werde die Blädder abwerfe. So guddersprech als werrdese das midd Absicht mache. So e Baam iss anscheinend e richdischer Lausert odder ääner vunn de Messies, wie mer heid saad. Die wo joo aach ihr Zeich äänfach irjendwo falle losse, wannses nimmeh brauche. Desweeje misse vill Bääm, damidd se leere, wie mer sich anstännisch benemmt, seallererscht mool in e Baumschul. Wanns gar nimmeh annerschd geht, also in Extrem-Fäll, doo duun se die Bääm joo sogar fälle. Bei der Volkshochschul gebbds zu dem Zweck e Motorsäge-Kurs. Wo mer unner annerem erfahrt, wie mer sich durch Schutzkläädung vor denne Gefahre schiddse kann. Doo iss doch so e Weihnachtsbaam wesentlich friedlicher. Es äänzische was doo passiere kann iss, dass mer hinnerher ganz verschrogg noo seinem ruft: Erna, de Baam nadelt!