Midd dem Ausdrugg Gourmet duud mer joo e Feinschmegger odder uff gudd Deitsch e Leggermäulche bezeichne. Das derf mer awwer nidd middem Gourmand verwechsele. Weil das eejer jemand iss, der wo Spaß dran hadd, fier beim Esse quandidadief heffdisch zuseschlaan. Jux unn Völlerei sosesaan. Also wo der ään eejer meh e Schlemmer iss, geheerd die Zielgrupp vunn der Veraanschdaldung meh zu de Genießer. De Mensch iss joo vunn Naduur aus eichendlich e Allesverwerter. Unn desweeje hadder, damidd mer ne nidd midd seine vierbäänische Hausgenosse verwechsele duud, die Feinschmeggerei erfunn. Unn doodebei werre dann exquisit die Gaume gekitzelt, bis die Geschmaggsnerve anfange fier se lache. Esse unn Trinke halt joo Leib unn Seel sesamme, saad mer als im Volksmund. Nur bleed, dass de Leib dann hinnerher meischt e bissje ausenanner geht. Weil awwer es Au joo aach middesse duud, desweeje gebbds bei dem Iewent nadierlich aach e Koch-Schau. Faschd so wie im Fernsehn, wo mer zugugge kann, was in der Pann so vor sich geht. Nur dass hie noch de Geruch vum Gebruzzelde als Zugabe midd debei iss. Weil hald die Nas am Kochgenuss nidd unwesentlich beteilischd iss.

Allerdings war friejer in de Haushalde die Dibbe-Guggerei nidd unbedingt beliebt, weil die joo meischdens ins Schnause ausgeartet iss. Die Mamme hadd doo jedem, der wo ihr in ihrem Revier in die Quer kumm iss unn sich am Esse vergriff hadd, uff die Griffele geklobbd: Ei, du schmeggschd mir graad!