Wammer bei jemand maije geht, doo iss das joo nidd esselwe wie wammer offiziell irjendwohin zu Besuch kummt. Es Maije iss meh so e Art spontaani Stipp-Visidd. Wo es Luwwies vunn schrääch geejeiwwer nur mool korz erinngeschneid kummt. Hauptsächlich fier e bissje se sprooche. Was e schmeichelhaffdi Umschreiwung iss fier e Betäädischung, wo mer annerschdwo aach gääre als Räddsche bezeichend. Also sosesaan es Penndang zum Stammdisch vunn de Mannsleid, nur eewe midd Kaffee statt midd Bier. Was sich iwwrischens uff Maije reimt, unn graad gudd zur Maijenzeid passt, das iss es Freije. Was soo hääschd weils joo iwwerwiechend im Freije stattfind. Weil mer doodefier ziemlich vill Pladds unn Auslauf brauchd. Weeje der schrittweise Anbahnung vunn womeeschlich intimere Beziejunge. Wo dann am Enn die Freijerei awwer paradoxerweis zu rer engere Bindung fiehrt.

Unn der Vorgang liefert dann widder e ausgiebischer Gesprächsstoff fier de Kaffeekladdsch im traute Kreis. Wann so e Päärche frisch verliebt durch die Wälder unn die Auen luschdwandelt, doo kummts als zu middlere Sachbeschädischunge am heimische Baambestand. Indemm de Galaan im Iwwerschwang Herzjer in die Rinde riddsd. Wie weiland schunn de junge Goethe in Sesenheim. Apropos Bääm, – geschdern war der Tag des Purzelbaums. Irjendwie iss das passend, weil joo ringsrum die ganz Welt e bissje uffem Kobb steht.