Demnäägschd in Arkadien?

Aufgepickt · Jedds isses schunn genau finfezwanzisch Johr her, dasse in Dengmerd die Fußgängerzon inngefiehrt hann. Sellemools hadd mer sich joo iwwerall ganz offiziell vun de autogerechde Stadt verabschied. Un de Benzinkutsche in der Innestadt die rood Kaard gezeid: Mir misse leider drauße bleiwe!

Weeje der bessere Luffd unn iwwerhaupt.Das kammer sich heid garnimmeh vorstelle, dass doo mool die villgeschmähte Blechlawine durchgerollt iss. Awwer das iss ball so wie middem Rauchverbood, wo mer aach leicht de Kobb schiddelt, wammer die alde Filme sieht. Wo mer bei Inneaufnahme manchmool faschd garnix meh sieht - weeje der ungebremsde Qualmerei. Ich beniddse joo statt dem Begriff Fußgänger-Zone liwwer denne Ausdrugg Flaniermeile, das klingt so noo Urlaub unn süßem Nichtstun. Wobei es Flaniere joo die gehobene Form der fußläufische Fortbeweechung iss. Mer kann awwer aach, wammers bodenstännischer hann will, gemiedlich iwwers Plaschder bummele, zum Beispiel an de Schaufinschdere entlang. Weil joo die scheenschde Gangart eindeudisch de Müssischgang iss.E ganz besonneres Vergnieche iss das nadierlich im Summer, doo kammer aach noch drause hugge. Unn gugge wie die annere Leid an emm vorbeidefiliere. Das iss manchmool scheener wie im Fernsehn. Weil mer das Treiwe joo ganz nah sieht.Es gebbd aach schunn Plän wie die gudd Stubb vunn Dengmerd in Zukunft aussiehn soll. Vielleicht sogar midd sogenennde Arkade. Se hann joo friejer schunn mool vorgeschlaa fier das Ganze se iwwerdache. Awwer bis das in droggene Tücher iss, misse mer halt uff gudd Wedder hoffe unn die Tellere immer scheen läär esse. Unn wanns schunn räänt, dann am beschde Scheine fier das ganze se finanziere.

Meistgelesen
Neueste Artikel
Zum Thema
Aus dem Ressort