Farwespiele im Herbscht

Aufgepickt · De Herbscht zeid sich joo derzeid vunn seiner farwefrooschde Seit. Awwer aach in Dengmerd selwer duun se midd de Farwe experimendiere, wie ich vor kurzem erfahr hann. Es gebbd joo awweile bei uns zusätzliche Fußgänger-Ampele, dassmer heil iwwer die Stroos kummt.

Wie ich doo an so ääner gestann hann, doo war ich schwäär irritierd, wie die uff äämool blau worr iss. Also, dass ich bei Rot stehn bleiwe muss unn bei grien gehn derf, das wääs ich joo alles. Awwer was, bidde scheen, soll ich mache wann die Ampel blau iss. Im erschde Moment war ich so baff, dass ich faschd vergess hann fier driwwer se gehn. Awwer dann hann ich doch fier mich gedenkt: Es iss mool ebbes anneres. Unn es hann joo aach schunn ganze Heerschare vunn Verkehrsteilnehmer in Dengmerd die Farb gewechselt. Ich bin jedds nur noch am Simelliere, was doo dehinner stegge kinnd, dass die es Grien in der Ampel abgeschaffd hann. Heischd das, mir solle die Hoffnung uffgenn, dass sich die Sidduazioon in absehbarer Zeit noch bessert. Odder vielleicht sollt die Ampel eichendlich am Schwimmbad stehn? Rätsel iwwer Rätsel. Weil bei de Farwe joo aach gemääner Hand immer e tieferi Simbolligg dehinner steggd, muss mer doo nämlich aach uffpasse, was fier e Farb mer beniddse duud. Mer kennt das joo: Rot duud nidd nur uffem Verkehrsschild Stopp bedeite, nää das iss aach noch die Farbe der Liebe. Awwer warum zum Beispiel die Kuh lila iss, doo binn ich noch nidd so dehinner kumm. Odder die Poschd gelb. Die dollschde Erklärung doodefier hann ich vor einischer Zeit mool gelääs: Gelb iss die Farbe des Neides unn Neid iss eine Leidenschaft. Unn die Poschd iss e Inschdiduzioon, die wo die Briefe zu de Leide schafft.

Meistgelesen
Neueste Artikel
Zum Thema
Aus dem Ressort