Mit Schwung ins neije Johr
Aufgepickt · Neilisch hann se im Fernsehn e Film gebrung, wo se Weihnachde in der Karibigg gefeiert hann. Denne Fluuch hädde se sich spare kinne, weils in unsere Breide faschd genauso warm war. Awwer das iss joo eichendlich nur konseekwend: wanns de Niggelaus schunn im September gebbd, doo fangt dann halt drei Monad spääder es Friehjohr an.
Unn middem Schi-Urlaub im Schnee iss dann aach Essisch. Zu meinem Freind Schorsch hann ich schunn im Spaß gesaad, ich werrd im neije Johr Urlaub in Davos mache. In Davos? Joo, da wos am billischde iss. Awwer jedds gugge mer mool nimmeh serigg uun schunn garnidd im Zorn. Jedds geht de Bligg noo vorre, wo es neije Johr schunn in de Startlecher steht. Faschd wie de Niggelaus alle Johre widder middme große Sagg voll gudde Vorsädds. Vielleicht kinnd mer doodebei sei verfriehde Friehlingsgefiehle dezu nuddse, dassmer e bissje meh Schwung in sei Lääwe bringt. Zu dem Zwegg hadd de Saarpfalz-Kreis extra e Akzion ins Lääwe geruf. Mer sollt jede Daach ziemlich genau 3000 Schridde gehn. Das wär gesund unn werrd aach Energie spare. Also die sogenennde fossile. Eicheni Energie muss mer doodefier allerdings schunn uffbringe. Unn dass mer sich beim Bään-Verdrääde nidd verlaaft, desweeje hannse sogar e Broschiere rausgebrung, wo die Stregge genau abgezählt unn uffgezeichnet sinn. Apropos Mobiltät: uff einische neije Busverbindunge, wo awwer nidd jedem schmegge, muss mer sich in Dengmerd aach instelle. Unn dann gebbds aach noch e ganz neijes Konzept wie mir unser Müll loswerre. Das iwwernemmt die Stadt jedds selwer. Awwer es hääscht joo Ent-Sorgung unn desweeje bräuchde mer uns doodriwwer kää Kobb se mache. Doo kammer nur saan: Mülle Grazie!
