Das war nadierlich schunn e Bolze, dasse in Hassel bei de Grundsteier-Bescheide die Summe irrtümlich graad verdobbeld hann. Doo kann emm schunn mool de Schregg in die Glieder fahre. Awwer annererseits, wo geschaffd werrd, werre aach Fähler gemacht, doodegeeje iss joo känner gefeit. Unn desweeje soll mer aach kännem e Vorwurf mache, weil irre joo menschlich iss. Mer wissd aach garnidd so richdisch, wemm mer eichendlich doo e Vorwurf mache solld. Das irre doodraan iss nämlich, dass an so Panne immer de Kommbjuuder schuld iss. Der Abbaraad iss joo iwwerhaupt die ärmschd Wudds im ganze Land. Wasse dem unner der Rubrigg technisches Vasaache nidd schunn alles in die Schuh geschob hann, wann mool ebbes nidd klabbd. Awwer das gudde Stigg hadd joo aach de ganze Daach unheimlich vill se duun. Zum Beispiel die ganze Briefe unnerschreiwe. So änner hann Sie bestimmt aach schunn kried: Maschinell erstellt unn ohne Unnerschrift gildisch. Ich finne das immer kloor, das doo amtlicherseits nimmand defier graadstehn will, was er geschrieb hadd. So e Drugger steht joo heid in jedem Haushalt. Awwer versuche Sies doch mool umgekehrt, unn losse die Unnerschrift weg mit der Begrindung Kommbjuuderausdrugg. Doo kinne Sie ebbes erlääwe.Unn was emm aach studdsisch macht, wie in dem Fall in Hassel: Das das hinnerher känner kontrolliert. Als Äänzelner misse sie sich alles dobbelt unn dreifach beglaubische unn abstembele losse, bevor das ganze iwwerhaupt amtlich iss. Unn wann jemand sei Geburdsurkunde nidd alle paar Johr uff de neieschde Stand bringt, doo kannsem passiere, dasser noch nidd mool nooweise kann, dasser exischtiert hadd.