Kaum iss Weihnachde unn de Johreswechsel rum, doo gehts schunn widder voll los. Die Feierdaache ware nämlich dissmool iwwerhaupt nidd arbeitnehmerfreindlich. Awwer so drei inngesparte Feierdaache sinn joo bekanntlich die reinschd Konjunktuurspritz. Wesweeje es joo aach midd unserer Wertschafft rasant noo owwe geht. Unn diesmool hadd es Johr joo sogar noch ääner Daach meh. Zum Gligg kummt das allerdings nur alle Schaltjohr mool vor. Awwer doodefier gebbds an de näägschde Weihnachde e satter Sonderurlaub, wie die bekannte Schlaumeiere schunn mool vorsorglich ausgerechend hann.Das kommt nämlich vunn denne sogenennde Briggedaache. Doodemidd sinn nidd Daache gemennt, wo besunnerschd wischdisch sinn fier de Innbau vun Zahnersatz, sondern die optimal Konschdellazioon vun Feierdaache. Awwer bis doohin iss joo noch e bissje hin unn es laafd noch vill Wasser die Bach enunner. In Dengmerd steht joo in demm Johr so einisches uff der Taachesordnung, odder soll mer besser saan uffem Spielplan. An Silweschder hannse joo schunn mool beime Riese-Iewent die Baumwollspinnerei emm Stresstest unnerzooh. Unn wann sich dann im Lauf vumm Johr die Frikzioone in de Frakzioone widder leeje sollte, dann kammer sich im Rathaus aach langsam widder uffs wesentliche konzentriere. Bevor Se jedds im Indernett guugle duun, - e Frikzioon iss schlicht unn äänfach e Reibung. Ich hädd das joo aach kinne halb so geschwoll ausdrigge, awwer dann wär der Witz nidd rauskumm, wo ich doo umzingelt hann. Sie merke, ich bin schunn widder schwäär gudd druff, wo annere noch vumm leddschde Johr e Fluddsch zieje. Das leid nur doodraan, dass ich mich geischdisch schunn uff denne ville Urlaub instelle.