Die leddschde Böllere sinn verschoss, de leddschde Sekt geschlürft unn es neije Johr leid als unbeschriebenes Kalennerbladd noch blitzblank vor uns. Weeje der Zahl dreizehn ware einische schunn widder schnell bei der Hand middem Kaffesatzlääse, der wo joo bekanntlich tiefschwarz iss. Unn hann uns prophezeit: jedds schlaads dreizehn! Awwer noodemm dass uff de Weltunnergang aach kää richdischder Verloss meh iss, losse mer uns doch äänfach vunn demm neije Johr mool iwwerrasche. Am beschde positief. Es werrd wahrscheins sowieso widder e ganzi Zeit dauere bis mer sich im Datum nimmeh verschreibt.Was emm awwer das Johr midd der schrääch Zahl schunn gleich simpaadisch macht, das sinn joo die ville Feierdaache, wo diesmool so ungemein ginschdisch falle. Obwohl ich de ääne unn de annere schunn stöhne heere: Nidd schunn widder Urlaub! Was fier de Arweddnehmer an der Konschdellazioon so erfreilich iss, das sinn die sogenennde Briggedaache. Wo mer midd bloos äänem Urlaubsdaach sich e scheeni klääni verlängerdi Auszeit genehmische kann. Wo mer sich dann widder vum Arweddsstress erhole und e paar Daach mool hänge losse kann. Also sosesaan e Hängebrigg. Bei der Geleechenhääd werrd dann e Loblied uff de Donnerschdaach gesung, wo se freindlicherweis e Haufe Feierdaache druff geleed hann. Wodurch mer denne sesamme middem Samschdaach als Sändwitsch geniese kann, middem Freidaach als Extrabelaach. Unn dass de Ooschder- unn Pingschdmondaach widder uff e Wochedaach fallt, iss genauso e scheener Zuuch wie dass am Tag der Arbeit nidd geschafft werre muss. An all de iwrische Daache gilt awwer immer noch es bekannte Heidekraut-Prinzip: Heide graut mir widder vor der Aarwedd.