Dass die Dengmerder Berschkabell dies Johr ihr 170. Gebordsdaach feiere kann, iss joo schunn ausgiebisch von kombeetender Seid gewirdischd worr. Awwer es gebbd dieser Daache noch e anneri - faschd hädd ich gesaad - Inschdiduzioon, wo in dem Johr e Jubiläum feiere kann: vor sechzisch Johr hann se bei uns die Körriworschd erfunn. Unn die iss seitdem joo aach in Lieder besung unn sogar lidderarisch vereewischd worr. Unn in Schiggi-Miggi-Kreise, wo mer sich joo vor garnix eekele duud, werrd se sogar midd Bladdgold garniert. Dasse aus dem Aanlass awwer die Delikadess zum Weltkulduurerbe erkläre wolle, iss allerdings nur e Gerücht. Weil das gudde Stigg nidd graad das iss, was die Weltgesundheits-Organisaddzioon als Grundnahrungsmiddel empfehle duud. In Dengmerd iss joo die Grundversorschung midd dem kulinarische Dauerbrenner trotz Inhaberwechsel an zendraaler Stell gesichert. Die Worschd werrd iwwerwiechend im Freije unn in verdikaaler Haldung verabreicht. Unn gess werrd se nidd midd Messer unn Gawwel unn aach nidd aus der Hand, wie die hundsgewehnlich Rooschdworschd. Nää, es besunnere doodraan iss, dasse schunn ferdisch geschnibbeld unn midd Zahnstocher aangebodd werdd. Das hadd denne Vordääl. dass mer sich die Fingere nidd feddisch macht. De Konsumend vun der Worschd steht dann geschmaggstechnisch vor der Entscheidung: e roodi odder e weisi. So wie aach sprachlich die ääne Körri saan unn die annere Kürri. Unn wem die Worschd nidd reicht, der gried als Säddischungsbeilaach noch e Porzioon Pommfridd, midd odder ohne Maajoo. Es wichdischde awwer iss unn bleibt die Soos: doo bringt das Gewerz aus Indie e Hauch vun Abenteuer uff die Hausmannskoschd.