Äänfach märchehaft

Aufgepickt · In der Vorweihnachtszeit hann joo jedds widder die Wünsche Hochkonjunktuur. Normalerweis duud mer sich geejeseidisch Gligg unn Gesundhääd wünsche. Awwer das allään reicht fier de Gabetisch nimmeh unn desweeje gebbds de Wunschzeddel.

Nidd jeder hadd nämlich es Talent, dasser seinem de Wunsch vunn de Aue ablääsd. Wammer vunn fromme Wünsch schwäddsd, doo mennd mer, dass die nidd in Erfillung gehn. Awwer im diesjährische Dezember soll joo e ganzer Schauer von Sternschnubbe bei uns erunnergehn.Wo mer aach nidd glaabt, dass die real wäre, das sinn joo die Märcher. Die fange oft so an: Zu rer Zeit, wo es Wünsche noch geholf hadd. Doo hadd dann zum Beipsiel de arme Müllerbursch odder e annnerer Droggeschbuddser drei devunn frei gehadd. Was er awwer aus Iwwereifer meischt vermasselt hadd. Kalennermääsisch gebbds joo vunn Märcher zwää Sorde: Sommermärche unn Weihnachtsmärche. Die Klassigger vunn de Grimms unn annere ware joo friejer als Theaaderstigge schwer beliebt. Allerdings nur in abgespeggde unn bereinischde Versione. Weils nämlich im Original - unn das vergessd mer gääre - garnidd so weihnachtlich zugeht. Ich kann mich sogar noch dran erinnere, wie ich als klääner Knirps iwwer Peterchens Mondfahrt gestaunt hann. Unn mordsmääsisch verschrogg bin, wie se denne midd laudem Knall doo enuff geschoss hann.Näägschd Woch duun iwwrischens in der Stadthall die Musenbolde die Tradition fleeche, wann se dort mit vill Begeischderung unn Musigg es Stigg vum Engel Alex uffiehre.Es gebbd awwer aach Leid, wo geeje de poedische Reiz vunn so Fandasieproduggde anscheinend immun sinn. Wammer denne midd so ebbes kummt, doo kried mer zur Antwort: Geh fort, verzähl mer kää Märcher!

Meistgelesen
Neueste Artikel
Zum Thema
Aus dem Ressort