Mundartkolumne für St. Ingbert „Von der Stirne heiß …“
Wann jemand in de leddschde Daache poeedische Anwandlunge gehadd hädd, doo wär so e Gedicht schnell ferdisch gewään. Mer hädd nur brauche Hiddse uff schwiddse se reime unn Schweiß uff heiß. Allerdings isses noch fraglich, ob mer doo iwwerhaupt die Energie uffgebrung hädd fier geischdische Heejefliech.
Die meischde denke joo bei so Temberaduure sehnlichsd an de kommende Urlaub. Friejer hadd mer doodefier denne ziemlich coole Ausdrugg Sommerfrische beniddsd.
Was awwer bei so rer Hiddsewell nidd unbedingt de passende Ausdrugg wär. Vielleicht graad noch, wammer in Schüre die Fiess ins Wasser vumm Kneippbegge eninn tunkt. Odder sich midd dem Schild „Betreten der Eisfläche“ mental erunnerkiehlt. Iwwerhaupt iss in dem Fall es Wasser in all Aggregaadzustänn es begehrdeschde Elemend.
Weil mers praggdischerweis inne unn ause verabreiche unn aanwenne kann. Spontan nadierlich am liebschde so kalt wie meeschlich, was awwer fier de iwwerhiddsde Korpus gar nidd so gesund sinn soll. Awwer nidd bloos de Mensche machd die Wedderlaache se schaffe, aach de groose unn klääne Viecher hängd bildlich geschwäddsd die Zung eraus. Freindlicherweis hadd de Tierschuddsbund dezu uffgeruuf, dass mer de Veschelcher ebbes zum Trinke unn zum Abkiehle hinstelld.
Doo kann ich als Vochel nur saan: Die Firma dankt! Wann de Wedderfrosch so uff Kleddertuur iss, doo gebbds ebbes, wo emm schunn beim Anbligg es Wasser im Mund sesammelaafd – e Becher midd Eis. Doo kinnd ich mich vergesse unn die ganz Kaloriezählerei gleich midd. Wann ich denne so vor mir siehn – midd Schoggostreisel, Grokand unn Sahne driwwer. Unn als Krönung noch e kläänes Schermche owwedruff – das iss dann äänfach zum Dehinnschmelze.
