Mundart-Kolumne für St. Ingbert Gesuchd unn gefunn
Aach wanns vielleichd noch e bissje zeidisch iss fiers Groosreinemache im Friehjohr, kanns joo nix schade, wammer sich zwischendurch zum Iewe mool de ään odder annere Egge vornemmt. Wo mer schunn mool de ganze Durjenanner grob vorsordierd.
Mer glaabds ball garnidd, was mer doodebei als fier Iwweraschunge erlääbd. Weil dann manchmool Sache aus der Versenkung widder ufftauche, wo mer gedenkt hadd, die wääre längschd schunn in der Versenkung, beziejungsweis beim Altpapier geland. Ich denke doo zum Beispiel an die uralde Foddos, wo mer mool im voorische Jahrtausend im Keller odder uffem Speicher gebungerd hadd. Im Fall, dassmer spääder Zeit hädd, fier die sich widder aansegugge.
Wo awwer in der Zeit de Zahn der Zeid e bissje dran geknabbert hadd. Awwer so e leichdi Patina unn e paar deggoratiefe Kraddser mache die joo dann als Doggumende nur umso wertvoller. Neije Foddos lande heidsedaachs komischerweis aach uffme Speicher. Awwer in dem Fall iss das der uff der Feschdbladd vumm Kommbjuuder. Wo mer dann allerdings aach Schwierischkääde hadd, wammer e beschdimmdes Bild sucht. Weil sich midd der Zeid so an die Stigger zwää- bis dreidausend Stigg angesammeld hann.
E Dengmerder Ehepaar iss neilich beim Stööbere in der Famieljechronig sogar uff zwää Foddos vunn 1900 gestoos, wo de Albert Weisgerber im Kreis vunn seine Kumpane druff se siehn iss. Das ware sellemools, wie mer deutlich erkenne kann, noch lääwensfroohe junge Leid. Wo noch niggs geahnt hann vunn dem Unheil, was e paar Johr spääder uff se zukomme solld. Insofern sinn die Bilder, wo se der Stadt grooszüügisch iwwerloss hann, anschauliche Zeitdoggumende unn e Erinnerung an Dengmerds beriehmdeschder Sohn.
