Wobei de Ärjer joo fiesikaalisch entsteht durch die Reibung vunn de Wunschvorstellunge an der Realität. Also doodurch, dass das, was graad passiert, sich nidd so entwiggelt, wie mir menne, dasses sinn missd. Odder wies de Dichter Schiller mool so scheen ausgedriggd hadd: Leicht beieinander wohnen die Gedanken, doch hart im Raume stoßen sich die Sachen.Unn so e Sesammestoß, der iss schwäär ungesund, weil doodebei de Blutdrugg Heejeluft schnubberd unn die Maachesäure Sonderschichde fahrt. Also im Endeffeggd die Krankekass belaschde duud. Aach wammer sich manchmool selwer am liebschde hinneninn trääde kinnt, ärjere duud mer sich doch am liebschde iwwer annere. De friejere Bundeskanzler Adenauer hadd allerdings schunn gesaad: Wer sich ärjert, büßt fier die Sünde vunn seine Mitmensche.Awwer vor hunnert Johr iss e Brettspiel erfunn worr, wo mer im traute Familijekreis lernt, wie mer denne Fruscht spielerisch unn sozialverträglich abreagiere kann.Die meischde hann Mensch-äjere-dich-nidd sicher schunn selwer gespielt. Das Spiel iss deshalb so beliebt, weil doo gewisse Ur-Inschdinkte wachwerre, unn nidd immer die salongfähischsde. Das leid an dem hohe Äätsch-Faktor bei dem Spiel. Wammer jemand annerer so richdisch midd Wonne erauskigge kann. Der wo korz sevor noch vor emm gelää hadd. Es iss faschd wie im richdische Lääwe. Was emm allerdings dann nidd so schmaggd, wanns emm selwer passiert. Awwer doo zeid sich dann de pädagogische Effeggd vunn dem Spiel. Mer werrd dezent druff gestoos, dass mer im Lääwe nidd immer gewinne kann.