Dass mir uns all gesinder ernähre sollde, dass iss joo de meischde vunn uns middlerweile klar. Aach wammer das nidd immer so richdisch uff die Reih krien. Mer kann doomidd joo aach gar nidd frieh genuch aanfange. Unn desweeje krien die Erschdklässler bei uns demnäägschd e biodinnaamischi Brood-Box midd in die Schul. Dass die sich nidd bloos am fascht Food vergreife unn iwwerhaupt mool ebbes se schmegge krien, wo kää kinschdliches Arooma drinn iss. Vill Kinner wunnere sich joo schunn, dass uffem Bauernhof kää lilani Kuh rumlaaft. Es Geejestigg zu soome gehaltvolle Pausebrood iss es Haasebrood. Das iss so e traurisches Grundnahrungsmiddel, wo mer aangeknabbert widder midd hemm bringt. Weils in die Geschmaggskaddegorie aarisch lebbsch fallt. Unn mers am beschde de Haase. Awwer mer derf joo de Junge kää Vorwurf mache, die gugges joo nur vun uns Alde ab. Unn mir wisse zwar was gudd iss, awwer das iss nidd unbedingt das was aach gudd duud. Desweeje lääwe mir joo aach in rer Gesellschaffd, woo uff Werte grooser Wert geleed werrd, besunnerschd uff Lewwer-Werte unn ähnliches. Awwer mer hadd joo aach de Indrugg, dass sich die Fachleid in punkdoo Ernährung als selwer nidd äänisch sinn. Unn wer annere gudde Roodschlääch gebbd, der soll moo in sei eichener Kolleschderienspichel gugge. Was ich zum Beischbiel e bissje iwwertrieb finne, iss dasse uns es gudde alde Budderbrood hann wolle maadisch mache. Doodebei spielt das joo sogar in der Phyisigg e groosi Roll, weeje seine äärodinnaamische Eichenschaffde. Weils garandierd immer uff die Seid falld, wo beleed iss. Unn mer nennds bei uns nidd umsunschd e Schmier. Das hääschd, mer soll die Budder digg uffdraan.