Jedds hann ich sogar gelääs, dasse endlich hinner ääns vunn de greeschde Müsterieje dehinnerkumme wolle, nämlich em Bankgeheimnis. Weil das sich awwer meischd im Ausland verschdeggeld, iss das nidd so äänfach wie mer sich das als geplagter Kläänsparer denkt. Awwer ich menn, das midd der Geheimniskrämerei hadds joo irjendwie schunn immer gebb. In der Kommunalbolidigg duud mer joo aach effendliche unn nidd effendliche Siddsunge unnerscheide. Bei denne dauerds dann e bissje länger bis mer devunn erfahrt. Die Kehrseit vun der Geheimhaldung iss nämlich, dass mer nix lang fier sich behalle kann. Sogar im Priwaadlääwe iss mer heidsedaachs gezwung, fier sei Daate meeschlichst middme sogennende Passwort se schiddse. Wo mer hinnerher selwer erscht widder draankummt, wammer denne Pass debei hadd. Unn dann noch de Huddel midd de Geheimzahle! Awwers allerneischde iss joo, dass mer sich so e Mikro-Dschibb in sei Blutbahn seddse kann, wo dann die eichene Lewwer- unn Blutwerde an die entsprechend Firma funkt. Awwer ich hann joo sowieso ball de Plan im Sagg. Ich krien nämlich immer so Emails zugeschickt midd Angeboode vunn Geheimtipps, die wo mei Doggder mir partout nidd verroode will. Odder doodsichere Börsegeheimnisse, woose nur mir ausnahmsweis im Austausch midd meine Bankdate anvertraue werrde. Also wann ich werklich wollt, mir kinnd känner meh ebbes vormache.