Es Au lääst joo aach midd

Mich werrd nur mool ääns inderessiere: Lääse Sie iwwerhaupt noch Biecher? Also so richdische. Iwwermorje iss nämlich de Welttag des Buches unn doo kinnds joo sinn, dass mer gefrood werrd, was mer als Leggtüre uffem Naachdsdischelche leije hadd.

Es hadd allerdings gehiesch, dasses ball iwwerhaupt kää Biecher meh gewwe werrd. Weils die joo awweile in eleggdroonischer Form sogar uffem Händi gääb. Odder mer gried se sogar ganz praggdisch uffem Tabledd serviert. Nur lääse misst mer se noch selwer. Das hääschd - eichendlich stimmt das joo aach nimmeh, mer kannse sich nämlich sogar vorlääse losse. Nadierlich hadd das alles aach sei Vordääle. Mer brauch dann zum Beispiel in de Urlaub nidd e extra Koffer middseschlebbe. Manche Biecher sinn nämlich ziemlich wolluminöös. Mer schwäddsd dann nidd unmsunschd vunn Wälzer. Wahrscheins weil mer sich naachts um Bedd erummwälzt unn iwwerleed, wo mer die annerdhalb Regalmeeder noch unnerbringe soll. Awwer so vielbändische Lexiköner, wo mool e Aanschaffung fiers Lääwe ware, die gebbds joo heid aach nimmeh. Uff der anner Seit glaab ich nidd, dass die gedruggde Biecher mool aussterwe. E scheen uffgemachdes Buch macht äänfach ebbes her. Es Au lääst joo aach midd. Unn e Buch kammer im Notfall aach verschenke, wann emm werklich garnix anneres meh innfalt.