1. Saarland

Em Schnubbe ebbes huuschde

Em Schnubbe ebbes huuschde

Hann Sie die Gribb schon hinner sich? Nidd die wo mer unner de Chrischd-baam stellt. Die kommt joo an Dreikeenisch meischd widder in die Schachdel serigg. Nää, ich menn denne Zustand, wo mer bei uns so scheen drastisch die Fregg nennt

Hann Sie die Gribb schon hinner sich? Nidd die wo mer unner de Chrischd-baam stellt. Die kommt joo an Dreikeenisch meischd widder in die Schachdel serigg. Nää, ich menn denne Zustand, wo mer bei uns so scheen drastisch die Fregg nennt. Unn wo jedesmool, wann ääner kräffdisch genosse hadd, geruf werrd: Gesundhääd! Bei dem allgemeine Geschniefe unn Gehuuschde frood mer sich als Kassepaziend, iss das jedds ebbes Ernschdes, was mer im Bett auskuriere missd odder geht mer doo middme alde Hausmiddelche draan. Zum Beispiel mit Inhaliere vumme steife Grogg. Mer will joo nidd weeje jedem Wehwehche glei zum Doggder laafe. Wo sowieso schunn die ganz Koroona huggd mitsamt ihre Bazille. Awwer awweile gebbds joo fier so Fäll im Indernedd hunnerde vun meh odder weenischer verninfdische Tipps. Desweeje werrd neierdings, wanns aanfangd im Hals se kraddse, nimmeh gegurgelt, doo werrd geguugelt. Unn mer erfahrt so niddsliche Sache wie, dass mer sich nur durch ään Naseloch schäuze soll. Weejem Luffdrugg im Herrn. Unn mer kried imme Lehrfilm gewies, wie mer sich richdisch die Hänn wäscht, ohne dass mer sich e Knoode in die Fingere macht. Am beschde wärs, mer waard äänfach ab, bis der ganze Zinnoower vorbei iss. Noo rer Woch odder noo acht Daach, je noo der Schwere vunn dem Fall. Vor allem die Männer sinn joo bekannt defier, dasse midd sesammegebissene Zähn still vor sich hinleide. E Indiaaner kennt bekanntlich kää Schmerz. Noo dem Moddo: so e Erkäldung iss mir schnubbe. Unn wannse dann uff alle Vire uns Birro gekrawwelt kumme, doo duud das vielleicht momentaan die Krankekass entlaschde. Es hadd awwer die Nääwewirkung, dass mer dort die ganz Belegschaft aanstegge duud.