Weil nämlich nix bei uns so heimisch iss wie lauder Bääm. Die Auswärdische, wann se noo Dengmerd kumme, wunnere sich immer was mir hie ringserumm fier üppische Wälder hann. Unn Holz in alle meeschliche Formaade iss joo im Grund nix anneres wie e meh odder weenischer fein geschniddener Baam. Die Zeidung zum Beispiel, wo sie grad in der Hand hann, war urspringlich joo mool e Stigg Holz . Aus Holz kammer joo unendlich vill Sache mache. Äänfache Bredder, e Laddezaun am Gaarde odder e repräsendatiefes Meewelstigg. Ich wääs nidd, ob mer heit noch Kechelfigure doodraus macht. Uff jede Fall ruft mer immer noch: Gudd Holz ! Unn mer kann, wanns drause kalt iss, Holz nemme fiers se verfeiere. Also meeschlichst nidd die Meewel, awwer so Pellets, wiese heit hääsche. Unn fier das Feier aansemache, doodefier gebbds dann es Streichholz.Wo mer graad vunn Hitz schwäddse: Die Sauna im Blau hadd aach Holz in der Hidd. Se iss nämlich inne midd Holz ausem Blieskaschdeler Wald ausgeschlaa. Das mache die Bääm joo gääre, dasse ausschlaan. Awwer im Ernscht - so nadierlicher Rohstoff macht äänfach e warmes unn gemiedliches Ambiende. E scheener Holzfuusboddem iss eewe unner ästeedische Gesichtspunkte ebbes Edleres wie ääner aus grauem Spriddsbeddong. Wer das nidd insieht, der iss awwer schwäär uffem Holzwää, wie mer so scheen saad.