Wobei noch nidd so richdisch klar iss, ab wann mer eichendlich zu dem entsprechende Personekreis dezugeheert. In denne Beirat kammer ab sechzisch gewählt werre, bei annere Organisazioone heischt die Demarkazionslinje fuffzisch plus. Wahrscheins, weil sich das so positief aanheert. Friejer hadd mer doodraan gemerkt, dass mer zu de Äldere geheert, wann im Bus die Jingere emm de Pladds aangebodd hann. Awwer das kammer in denne Zeide joo vergesse. Apropos vergesse: Ich hann das in dem Moment gemerkt, wie ich ungefrood lauder Proschbeggde ins Haus odder E-Mails geschiggd kried hann midd ungemein niddsliche Tipps, wie ich mei geischdischer Verfall graad noch uffhalle kinnd. Am beschde midd Gehirn-Dschogging, bis die Birne glieht. Wann mer nämlich nimmeh so richdisch im Bilde iss, wos lang geht, doo saad mer als im Spass: Doo siehschd du ganz scheen alt aus. Wos doch aangeblich nidd druff aankummt, wie mer aussieht, sondern wie mer sich fiehlt. Allerdings wird das joo heische, dass mer morjens vill älder wär wie oowens. Na ja, ääner Trost hadd mer joo: wer morjens verknidderd iss, hadd de ganze Daach Zeit fier sich se entfalte.

Vumme ganz annere Fänomeen hann ich neilich gelääs: Die Experte konschdadiere doo e gewissi "Vergreisung" vun de Soziale Netzwerke. Es Durchschnittalder leit dort jedds bei sagenhafde 38,7 Jahr!