In Dengmerd iss joo jedds so e Diskussion losgeträäd worr, weeje dem riesische Inkaafszendrum wo doo aangeblich hin soll. Wo se schwääre Bedenge hann, dass dann die normale Geschäffde in der Innestadt ziemlich unner Drugg kumme. Unn die hann joo sowieso schunn denne Huddel, dasse zum Beispiel ihr Effnungszeide nidd richdisch unner ääner Hudd krien. Obwohl mer joo wääs, dass so ebbes nidd graad es beschde Loggmiddel fier die Auswärdische iss. Unn fier die Urinnwohner se halle, doo muss mer sich halld aach servicemääsisch ebbes infalle losse. Apropos Inkaafe, doo kammer als die kloorschde Sache erlääwe. Neilisch hann ich gesiehn wie änner so e Abdeggung fier sei Audo kaafe wolld unn das Ding vorher an seinem Waan ausprobiere wollt, obs aach passd. Ich gehn mool nur kurz vor die Dier, hadder gesaad. Sie brauche kää Angschd se hann, ich loss ihne solang mei Fraa als Pfand doo. Was iss das fier e scheener Zuuch, hann ich fier mich gedenkt, wann änner so sei Schmuggstigg als effendliches Zahlungsmiddel ins Gespräch bringe duud. Unn tatsächlich hadd sich die Verkeiferin aach noo der Fraa umgedreht unn hadd die vun owwe bis unne gemuscherd. Fier se gugge, ob se das Risiko ingehn solld. Ich werrd joo so ebbes nie mache, weil ich ganz genau wääs, was ich an meinem hann. Unn ich werrd so e Wertobjeggd aach nie hergenn, noch nidd emool fier es scheenschde Audozubeheer. Mei Instellung hadd sich scheins schunn rumgesproch. Imme annere Geschäffd hannse mich nämlich vor kurzem gefrood, ob ich aach Treuepunkte krien werrd. Das misse se schunn midd meiner Fraa bespreche, hann ich bloos gesaad. Unn hann doo debei so treiherzisch wie meeschlich geguggd.