Mundartkolumne Klingelingeling
An zwää Termine im Johr werrd nidd uff de Penning geguggd. Das iss im Summer im Urlaub unn jedds vor de Weihnachde. Das fangt schunn in der Atzwenz-Zeit an, dasses Portmonnee e bissje loggerer siddsd.
Unn desweeje krien joo aach die meischde Lohnemfänger jedds ihr Weihnachtsgeld. Was die dann doodemidd verkonsumiere, dass summiert sich. Unn duud die Konjunktuur aankurwele. Sosesaan als Doping fier die Volkswertschaffd. Wammer das Geld nämlich uff die hohe Kande leeje werrd, doo wär mer hochkandisch aangeschmiert. Insofern duud mer joo doodemidd schunn mool e guddes Werk.
Es gebbd dann nadierlich Leid, wo doodriwwer die Nas rümfe. Vunn weeje Konsumrausch unn so. Awwer wammer sich fier die Weihnachde midd Geschenke indeggd, doo iss das joo eewe graad nidd fier emm selwer. Das iss es Erfreuliche an der Zeit, dass sogar e ausgewiesener Kniggstiwwel wie mei Freind Schorsch uff äämool die Spendierhose aanhadd.
An Weihnachde kried es Geld sosesaan Fernweh: Wies in dem Lied hääscht: Taler Taler du musst wandern! Wobei mer joo die Scheine unn es Minz ball garnimmeh se siehn kried, weil es Geld heid meischdens aus der Steggdos kummt. Unn doo kammer dann zum Feschd der Liebe e klääner Dääl glei weiderleide. Fier e werklich gudder Zweck unn fier all die wo pekuniäär nidd so gudd gepolschderd sinn.
Unn in der Zeidung hadd geschtann, dass ääni Bevelgerungsgrupp vor korzem finanziell hadd misse schwäär Feddere losse: die Milljardäre. Es gääb jedds 430 weenischer doodevunn. Also wann die all nimmeh zu dem illuschdre Kreis geheere, doo misse die joo um Hunnerde vunn Millioone ärmer worr sinn. Doo kammer mool siehn wie schlimms manche Leid geht. Unn das kurz vor Weihnachde.
