Mundartkolumne Wemm iss die Kerb? Unser!

De Herbschd iss joo e ziemlich verschdruddeldi Johreszeit. Weil er kalendarisch schunn am 1. September aanfangd, awwer metereo-logisch erschd die näägschd Wuch am Mondaach. Weil sich die Logik nidd gleich erschließt, haddmer awwer aach ganz bestimmde markande Ereischnisse, wo mer werklich draan merkt, dass de Summer rum iss.

Mundart Kolumne von Horst Lang
Foto: SZ/Robby Lorenz

Es Freibad geht zu, die Heizung uff unn im gudd sordierde Fachhannel steht mer alle Johr widder vor de Auslaache unn denkt: Ei iss dann heid schunn Weihnachde?
Doo leije schachdelweis liebevoll verpaggd Zimtsterne, Schbriddsgebaggnes unn diwerse Sorde vunn Leebkuche. Iwwrischens – zur Beruhischung vunn de Tierschiddser – hadd doodefier kää äänzischer Leeb misse sei Lääwe losse.

Awwer die Geschäffde mache das joo nur widderwillisch, hannse gesaad. Weil die Kunne das äänfach verlange werrde. Unn ausserdemm hädd das nix midd Weihnachde se duun. Die Pläddsjer nenne sich jedds nämlich ganz offiziell „Herbschdgebägg“.

Was emm awwer definitief aach draan erinnert, dasses langsam uff de Herbschd zugeht, das iss, wann die Kerb uffem Programm steht. So wie jedds ab Samschdaach in Rohrbach. Wo se denne scheene Brauch midd de Kerwebuuwe unn Määde widder aus der Versenkung geholl hann. E zinnfdischi Kerb iss joo noch so richdisch e Feschd fier die ganz Famielje. Midd alle meeschliche Tradizioone vunn anno dunnemools. Midd Kerwebäämche unn Kerweredd unn Kerwegeld fier de Nachwuchs.

In Bayern hannse e genereller Termin fier die Kerb feschdgeleed. Weil die Junge friejer vunn Ort zu Ort gezoh sinn unn mer wochelang ausem Feiere nimmeh rauskumm iss. Unn wann ich mer die Veranschdaldungskalenner in de näggschde Woche so aangugge, doo kummt mir das irjendwie bekannt vor.

Meistgelesen
Neueste Artikel
Zum Thema
Aus dem Ressort