Mundart-Kolumne Jux unn Dollerei
Mei Freind Schorsch hadd graad die Daache e Kurs angefang. Es gängd doodebei um die Achtsamkeit gehn unn das wirrd zur Zeit schwäär im Trend leije. Ich hann nur gedenkt, dass das ihm sei Fraa schunn seit Johre versucht beisebringe: Pass doch uff, wo de hinndräädschd midd deine Quadratlaadsche!
Es iss awwer nadierlich kää Fähler, wammer sei fünf Sinne beisamme hadd.
Allerdings iss das jedds sicher kää passendes Thema fier die Faasenacht. Wo mer sich joo nidd unbedingt innerlich sesammereise will. Eejer mool aus sich erausgehn. Unn die Sinnesorgane manchmool e bissje benewwelt sinn. Dementsprechend sinn dann die fünf Sinne aach: die Bleedsinn, de Unsinn, de Stumpfsinn, de Wahnsinn unn de Leichtsinn. Fier jeed Johreszeit ääner, weil die fünft bekanndlich die Faasenaacht iss.
Mer nennt die Zeit joo aach gääre die dolle Daache. Wobei mer de Verdacht hann kinnd, wammer die Schlaachzeile in der Zeidung sieht, dass das Gütesiegel aach uffs iwwrische Johr ganz gudd passe werrd. Awwer das iss widder e ganz anneres Thema. Uff jede Fall iss die närrisch Zeit doodefier doo, dass mer de Alldaachs-Zwang hinner sich lossd. Sich e bissje treiwe lossd im Faschingstreiwe. Unn ausgiebisch die Narrefreihääd geniest. Die woos emm erlaubt, dass mer mool e bissje Unfug treibt. Demm sei positiefes Geejestigg, de Fug, der hadd nämlich graad nidd zur Verfüchung gestann.
Sie merke, hie werrd mool uff de tiefere Sinn gepiff. Unn doodefier de heejere Bleedsinn hochgehall. Der duud sich zum Beispiel zur vollen Blüte entfalte im sogenennde Kalauer. Erfunn vumme gewisse Carl Auer aus Witzighausen. Das iss dann der Moment, wo mer die Aue verdrääd: Heid flieje die Widdse awwer widder dief.
