Mundart-Kolumne Fort midd dem Gelumbbs unn Krembel
Mer lääst joo oft in der Zeidung vunn staddisdisch hochprozendische Forschungsergebnisse, wo dann anschließend im Quiz abgefrood werre. So hann die Kandidaade doo neilich misse schäddse, wievill Prozent vunn der Bevelgerung Linksschläfer sinn, uff Mallorca Urlaub mache odder bei der Steierklärung schummele.
Es neieschde aus der Wunnerwelt der Zahle war jedds e Umfraache. Wo erauskumm iss, dass noome Umzuuch jeder fünfde noo fünf Johr noch nidd all Kischde ausgepaggd hadd.
Ich finne das normal. E Haus nennt mer joo e Immobielje, weils feschd unn unbeweechlisch doosteht. Awwer de ganze freilaafende Nibbes, Krembel unn Ramsch, wo sich doodrin im Lauf vunn de Johre so aangesammelt hadd, der kummt beim Umzuuch unverhoffd zum Vorschein. Unn wammer ne dann gligglich in e paar Duddsend Kischde verpaggd hadd, iss mer froh, dassmer das ganze Gelumbbs imme geeichnede Stauraum verschdeggele kann. Wo mers nimmeh sieht, awwer troddsdeem sich selwer weismacht, dassmer im Notfall nochmool draan käm. Mer wääs joo nie!
Die Profis, wo de Leid helfe beim Ausmischde, sinn allerdings der Meinung, mer solld alles, was mer noo äänem Johr nidd vermissd hadd, äänfach fortschmeise. Das falld uns awwer schwäär, weil mir vunn Naduur aus joo Jäächer unn Sammler sinn. Besunnerschd beliebt iss die Jachd uff vermeintliche Schnäbbcher. Die wo sich dann heimlich still unn leise besiddsergreifend in der Behausung ausbreide. Unn es meischde devunn lossd sich hinnerher noch nidd emool gewinnbringend in rer TV-Sendung verscherwele. E eleggdrischer Eierkocher, de Dörrobst-Audomaad unn de Raggledd-Grill sinn nämmlich nidd rar unn antik genuch, dasse e Fall wäre fiers Museum. Eejer fier die Tonn.
