Mundart-Kolumne Siwwe uff ääner Streich
Derzeit werre joo die Moodalitääde, wie mir uns verkehrstechnisch fortbeweeje, heffdisch diskuddierd. Vor allem es Erummgondele in der Luft iss ziemlich in die Kridigg gerood. Mer nennd so e Gerääd sogar schunn e Fluuch-Zeich.
Unn es iss joo dem gesunde Menscheverstand nur schwäär se vermiddele, dass mer ball billischer im Fliecher zum Ballermann kummt wie middem Bus noo Neinkerje zum Dochdermann.
Doodebei duunse emm joo heffdisch uffstiwwele, dassmer midd Busse unn Bahne fahre solld. Midd der Bahn iss das in Dengmerd allerdings so e Sach. Weil hie de Bahnhof teilweise imme Zustand iss, wo mer besser nidd nääjer druff inngeht. Weil mer sunnschd Zustänn kried. Desweeje hammir zum Ausgleich noch so ääner, nämlich e Busbahnhof. Unn damidd mer denne midd dem annere nidd verwechsele kann, hääschd der Knoodepunkt ganz romandisch de Rendezvous-Pladds.
Der Ausdrugg Bus iss joo eichendlich e Abkerzung fier das Wort Omnibus. Das kummt ausem Laddeinische unn hääschd: fier alle. Was joo aach logisch iss, weil sichs doodebei um effendliche Verkehrsmiddel hanneld unn nidd um priwaade. Midd der Endsilbe „bus“ gebbds aach noch annere scheene alde Werder. Wie zum Beispiel Fidibus, Globus odder Schammbus. Das iss das Getränk midd demm wo die Schiffe gedaaft werre. Das kinnd mer bei uns zum Insadds bringe, weil jedds hie graad e ganzi Flodde vonn fungekelnaachelneije Ingo-Busse in Betrieb genomm werrd. Die siwwe knallroode Hingugger sinn uffem neijeschde Stand der Technigg. Wie ich meinem Freind Schorsch gesaad hann, die hädde sogar W-LAN an Bord, doo hadd der nur begriffsstuddsisch geguggd. Doodevunn versteht der nur Bahnhof. Unn schunn ware mer widder beim Thema.
