Awwer nadierlich duud der sich uff dem Schleichwää erschd mool so richdisch verfranse unn bleibt irjendwo in der Pampa stegge. Es Geejestigg zur Abkerzung iss joo de Umwää odder noch schlimmer die Umleidung. Weil mer doo gezwungenermaase uff Stregge dirigierd werrd, wo mer garnidd hinwolld. Unn das iss ebbes, wo inrer Zeid, wo alles hoppla-hopp unn dabber gehn muss, de Leid iwwerhaupt nidd schmeggd.
Unn dass mer desweeje immer de bekweemschde Wää sucht, das merkt mer sogar in de zwischemenschliche Kommunikazioon. Doo spielt sich uffem Händie das, was vor Urzeide mool e Dialog war, greeschdedääls nur noch in Abkerzunge ab. Unn wammer sei Mail standardmääsisch midd MfG unnerschreibt, dann kummd de Gruus nidd so freindlich riwwer, wie er urspringlisch vielleichd mool gemennd war. Awwer weil mer heidsedaachs, wammer ebbes hermache will, joo minneschdens an e paar Duddsend Freinde alle Gebodd Meldung mache muss, iss fier ganze Werder kää Zeid meh. Das erinnerd schwäär an de Lehrer friejer, wann der emm bei akuter Mundfaulhääd angeschnauzt hadd: „Im ganzen Satz!“ Wobei ironischerweis die Uffforderung eichendlich aach kää kompledder Sadds war.
Awwer aach in de Amtssprooch gebbds haufeweis Abkerzunge, wo dann immer so e hochoffizieller Aanstrich hann. Besonnerschd wammer nidd genau wääs, wasse hääsche solle: 2 G plus, G8 beziejungsweis G 9 unn GEZ. Annere widder sinn allgemein bekannd, wie zum Beispiel km/h fier Stunnekilomeeder. Obwohl doo gar kää Stunn drin vorkummd.