Mundart-Kolumne für St. Ingbert Laudsprecher im Nedds
Es Indernedd unn alles, was demidd sesamme hängd, iss joo aus unserm Alldaachslääwe garnimmeh wegsedenge. Graad die leddschde zwää Johr haddmer die positiefe Meeschlichkääde schäddse geleert. Dassmer aach uff Distanz hadd kinne im Kontaggd bleiwe, sogar midd Bild unn Ton, leif unn in Faarwe.
Awwer die flächedeggende Verbreidung vunn digitaale Inhalde hadd aach weenischer erfreilische Begleiderscheinunge, wie mer die leddschd Zeit gesiehn hadd. Unn wieso das, was uff bestimmde Inderneddseide so an Freindlichkääde abgeht, unner soziale Medieje fiermierd, iss mir schleierhaffd. Es falld emm doo eejer de geejedäälische Ausdrugg inn. Es herrschd e Umgangston wie bei de Kesselfligger, wobei mer dem ehrewerde Handwerg eejer noch unrechd duud. Treffender iss doo schunn die Bezeichnung Plattform, weil se das Niewoo vunn manche Äussserunge ziemlich gudd kennzeichne duud.
In der Naddur siddsd imme Netz meischd e Spinn, in de soziale Neddse siddse nidd selte die Spinner. Denne ihr Tonfall iss desweeje so rubbisch, weil sich die Aansicht brääd gemacht hadd, wer am laudschde kreischd, der kried Recht. Unn die Krischer im Nedds erkennt mer am infladdsionääre Gebrauch vunn Ausrufezeiche unn Grossbuchstaawe iwwer de halwe Text.
Bei de meischde, wo sich doo so zwanghaffd im Ton vergreife, iss das wahrscheins bloos de innere Fruschd, wo unbedingd eraus muss. Unn doo kummt emm joo so e technisches Wunnerwerk wies Indernedd direggd wie geruf. Im perseenliche Gespräch wäre die vielleicht aach all friedlicher unn kläänlauder. Awwer so im Schudds vunn der Annonümitääd, doo huggd emm so e kläänes giffdischgrienes Männje im Nagge unn flüschderd emm ins Ohr: Nur kää Hemmunge!
