Mir werre joo in der derzeidische Krise direggd midd der Noos druffgestoos, was so ebbes wert iss. Dassmer nidd allseweit weg e verlässlichi Innrichdung hadd, wo sich im Notfall um emm kimmerd.

Mir lääwe joo iwwerhaupt inrer Wertegesellschaffd. Unn in dem Fall gehts dann um die Blutwerte, die Lewwerwerte unn die Laborwerte. Doo is mer nadierlich imme Krankehaus midd Beschdnoode am beschde uffgehob. Weil mir awwer aach noch inrer Wettbewerbsgesellschaffd lääwe, sinn so Bewertunge generell ziemlich weit verbreitet. Seit Urzeide gebbds schunn die beliebde Noode in der Schul. Wo jedds graad die Abituriende demidd se kämpfe hann, weeje de suboptimale äusere Bedingunge. Odder denke se nur mool an de Sport, der wo jedds widder aus seinem Dornreesjeschloof erwacht. Doo werre Ranglischde unn Tabelle gefiehrt, wo mer ablääse kann, ob mer zu de Gewinner geheert odder zu de Luuser. Wos aach um Noode odder besser gesaad Noodierunge geht, das iss an der Börse. Die hadd sogar e ganz eicheni Hagg-Ordnung, wo de Fachmann Ranking nennt. Doo gebbds nämlich verschiedene Güteklasse: A, B odder C. Das iss dort faschd genau so wie beim Innkaafe, beim Obst unn bei de Eier. Doo gebdds aach die diwerse Handelsklasse. Awwer in dem ääne wie in dem annere Fall iss das noch kää Garandie, dass sich doo nidd doch noch e faules Exemplar drunnergemogelt hadd.