Mundart-Kolumne für St. Ingbert Scheen iss annerschd!
Dengmerd bezeichend sich gääre als Tor zur Biosphäre. Awwer wer als Auswärdischer zu uns kummt, unn zwar middem Zuch, der kried seerschd mool e middlerer Schogg.
Wann die Fuusgängerzoon nämlich die gudd Stubb vunn Dengmerd iss, dann iss de Bahnhof, bildlich geschwäddsd, so ebbes wie die Hausdier. Die iss allerdings imme Zustand, denne wo mer nur midd dem treffende deitsche Wort „unscheen“ bezeichne kann. Wobei die eichendlich joo die Wiesiddekaard vunn rer Stadt sinn soll. Es äänzisch Gudde, was mer dem abgewinne kann iss noch, dassmer sich doo ausgiebisch midd Lääsefudder unn annere Nahrungsmiddel inndegge kann. Das iss aach es beschd, dass mer sei Noos inn e Zeidung eninnsteggd, doo fallt emm es schrooe Ambiende nidd so uff.
Die Stadt hadd joo vor e paar Jährcher schunn mool de Vorpladds uffgemeewelt. Unn vunn ause macht das joo aach kää schlechder Indrugg. Es Dumme iss nur, dasse inne in dem Gebäude garnidd de Hausherr iss. Das iss die Deutsche Bahn. Awwer die iss scheins garnidd so begeischderd vunn der Idee, sie solld an dem Zustand ebbes ännere. Mer kinnd aach saan, se iss uff dem Ohr taub unn versteht bei dem Wort Renovierung immer nur Bahnhof. Was nadierlich kää scheener Zuch iss vun der Bahn.
Awwer jedds kummt scheins Beweechung in die Sach. De neije Oo-Bee unn e Bevollmächdischder vunn der Bahn hann sich das Iwwel schunn mool vor Ort aangeguggd unn Besserung versproch. Es Problem iss awwer wie immer, dass mer ziemlich vill Geld in die Hand nemme missd, wies neudeitsch so scheen hääschd. Unn doo hadd mancher vielleicht Bedenke, dasser sich die Hänn dreggisch machd. Awwer kää Angschd: das geht heidsedaachs alles bargeldlos unn per Iwwerweisung.
