Die Atzel De Duft vunn Pläddsjer
Das gebbds aach nidd alle Daach, dass e veritables Staatsowwerhaupt in Dengmerd Stazioon macht. Awwer am kommende Mondaach besucht de hohe Gaschd in der heegschd Kerch, wo mer hie hann, e feierlicher Gottesdienst.
Wo dann nooher am Heilische Oowend in ganz Deitschland ausgestrahlt werrd. So e Ereischnis iss nadierlich e besonneres Renommee fier die Stadt. Awwer es halt die, wo doo fier die Organisazioon verandwortlich sinn, ganz scheen uff Trab. Unner annerm hann die sich misse de Kobb zerbreche: Was duud mer em erschde Mann im Staat zu dem Aanlass schenke? Weil der joo bestimmt schunn alles hadd.
Die äldere Dengmerder kinne sich vielleicht noch erinnere, wie sellemools de erschde Bundespräsident, de Papa Heuss, 1957 in Dengmerd uff Besuch komm iss. Der war nämlich e Schulfreind vumm Weisgerber gewään. Unn es Maria Gräf, koschdümmierd als Bas Kath, haddem e Blumestrauß iwwerreicht.
Weil das awwer heid nimmeh ganz zeitgemääs wär, sinnse uff die Idee verfall, em Staatsgaschd passend zu dem Termin e Muschderkollekzioon vunn Weihnachtsgebägg se schenke. Nidd soone aus der Maschien unn vumm Band. Nää, eichenhändisch selbschdgemachde noo aldem Familieje-Rezebbd. So Pläddsjer vumm heimische Baggblech werre auser midd de spezielle Zutaade aach midd besunnerschd vill Liebe gebaggd. Das merkt mer joo schunn am Duft, wo dann durch die Wohnung zieht unn e feschdlichi Stimmung verbreide duud.
Doo werrd emm dann klar, woher der scheene Ausdrugg „Gefiehle wie Weihnachde“ kummt. Wer wääs, vielleicht kommt de Bundespräsident bei denne Liebesgabe uff de Geschmagg. Unn die Dengmerder Pläddsjer stehn demnäägschd bei der Unesco uff der Lischd vumm immaterielle Kulduurgut.
