Mundart-Kolumne : Middelstadt unn Middelalder

Zum Jubiläum vunn der Berschkabell werrd am Samschdaach in Dengmerd e musikalischi Zeitreis gebodd. Midd der Vertonung vumm „Herr der Ringe“ unn dem monumentaale Werk „Carmina Burana“ kammer in der Industriekathedrale akussdisch ins pralle Lääwe vumm Middelalder inntauche.

Die ladeinische Texte sinn allerdings nidd unbedingt ländlich-siddlich, eejer e bissje meh in Richdung deffdisch unn sinnesfreudisch. Awwer das iss joo ziemlich genau das, was mir uns unnerme richdische Middelalder, wies im Buch steht, so vorstelle. Odder sollt mer zeitgemääser saan, so wie mirs Middelalder als emol in de Kinofilme gesiehn hann.

Die Epoche iss joo seit der Romanndigg schwäär beliebt unn entsprechend romanndisch sinn aach unser Vorstellunge devunn. Wammer sich die diverse Middelalder-Märkt mool anguggd, doo wimmelts nur so vunn edle Ridder unn Burschfrolleins. Vunn de Knabbe, Zauberer unn Gaukler mool ganz abgesiehn.

Es muss irjend ebbes an dem ganze Ambiende draan sinn, was die Leid an dem Zeidalder so fasziniert. Wahrscheins die farwefroohe unn bundscheggische Koschdüüme. Unn nadierlich fier all die, denne wo de Alldaachstrodd se fad iss, es angeblich so freie Lääwe. Unn iwwer allem leid de Duft vunn Abenteuer unn Feschdgelaache inklusiefe Ridderturnier.

Die Realität uff sorer Bursch war allerdings e bissje weenicher prunkvoll. Die Rüschdung hadd an all Egge gezwiggd, e Zendraalheizung hadds noch nidd gebb unn aach kää Dobbelverglasung. Desweeje hadds aach im Winder gezooh wie Hechdsubb. Unn de greeschde Middelalder-Fänn iss späädeschdens dann, wanners Zibberlein kried odder Zahnweh hadd, froh, dasser in der heidisch Zeit lääbt midd Krankeversicherung unn Pensionsberechdischung.