Iwwerall in de Meedieje grinst uns so e iwwerdimensionierdes kuchelfermisches Ungetiem midd Nobbe aan. Obwohl de Iwweltääder joo selwer eejer klään iss. Das Ding erinnert dääls an e teerapeudischer Massage-Ieschel unn dääls an e ungemiedlichi Waffe ausem Middelalder, de sogenennde Morgenstern. Was die flächedeggende Gemiedslaache aach nidd graad hebt. Die schwankt nämlich gradd zwische unverandwordlichem Leichtsinn unn iwwertriewener Panik. Es iss awwer aach nidd äänfach, in sorer Sidduazioon nidd de Kobb unn die Oriendierung se verliere. Uns werrd jedds all schmerzlich klargemacht, was de Unnerschied iss zwische Iwwerflissischem unn unbedingt Not-Wendischem. Wobei in dem Wort schunn de Ernschd der Laache aanklingt.

Unn fier e Kolummnischd isses e heikli Sach, wanner denne Ernschd e bissje uffloggere will midd ironische Bemerkunge. Ohne dass sich jemand uff de Schlibbs geträäd fiehlt. Es gebbd nadierlich schunn paradoxe Erscheinunge: Wammer de lobenswerde Apell heert, dass mir jedds als Gesellschaffd sesammestehn missde. Awwer meeschlichst midd minneschdens me Meeder Abstand. Also was soll mer mache? Am beschde bleibt mer dehemm – wammer kann - unn iss froh, dassmer kää Bollidigger iss.

Die woos aach schwer getroff hadd, das sinn joo die arme Hamschdere, die wo jedds vumm Aussterwe bedroht sinn. Weil se so masseweis kaaf werre, dasse midd der Produggzioon nimmeh nookumme.