Annerschdwo uff der Welt gebbds noch ganz annere Zählverfahre. Awwer de Mensch hadd halt gääre sei Gereescheldes unn ebbes, wo er sich draan halle kann. Die Johreszeide zum Beispiel, wo in scheener Reechelmääsischkääd immer widder scheen hinnerenanner intruudele. Manchmool friejer unn manchmool spääder.
Wobei se sich nidd ganz äänisch sinn, wann so e Johreszeit eichendlich genau aanfangd. Je noodemm, ob mer das meteorologisch betrachde duud odder kalendarisch. Kalenner sinn awwer nidd nur doodefier gudd, dassmer wääs was heid fier e Daach iss. Doo kried mer oft aach Tibbs wie mer denne am beschde rumkried. Unn iwwers Lääwe im Allgemeine. Midd so gleichnaamische Sprich wie: Wann du denkschd es geht nicht mehr ...
2020 iss joo gewissermaase e Schnabbszahl. Jedds frooe se mich nidd, ob das e guddes Oomen iss odder e schleschdes. So gudder Sprech, mer kinnd das nur ertraan wammer beschwibbsd iss. Awwer mer wolle es neije Johr, wo joo noch nix verbroch hadd, nidd gleich schlecht mache. Ich hann zum Beispiel in rer Iwwerschrift gelääs: Neue Verwaltungsspitze im St. Ingberter Rathaus arbeitsfähig. So ebbes macht em doch Hoffnung. Odder die Daache, die werre joo schunn langsam widder länger. Morjens unn oowends immer ään bis zwää Minüddcher pro Daach. Das iss doch schunn mool nidd schlecht fier de Aanfang. Unn so sollde mirs vielleicht aach halle im kommende Johr. Immer scheen ääner Schridd vor de annere. Unn dann mool gugge, wo das hinfiehrt.