1. Saarland
  2. Saarpfalz-Kreis
  3. St. Ingbert

Mundart-Kolumne Die Atzel für St. Ingbert

Mundart-Kolumne für St. Ingbert : Stimmungsberichd uff Dischtanz

Was macht mer, wammer nidd raus kann odder nidd soll. Unn aach die soziaale Kontaggde so inngeschränkt werre, dassmer sich nidd mool meh die Hand schiddele derf. Es äänfachschde wär – weil mer doodezu iwwerhaupt kää technische Gerääde brauchd –, dass mer zur Abwechslung mool in sich geht.

Awwer doo haddmer evenduell Probleeme, dass mer iwwerhaupt de Ingang find. Weil mer dort schunn eewisch nimmeh war.

De Jingere falld das wahrscheins am schwerschde, weil die joo denne verständliche Drang noo drause hann. Was ganz friejer zu der Parole verleided hadd, dass mer die Junge vunn der Stroos holle missd. Awwer so wie awweile war das wahrscheins sellomools nidd gemennd.

Zum Gligg gebbds joo heid als Maasnahme geeje de Laacherkoller vill Meeschlichkääde midd seine Middmensche aach iwwer Dischtanze in e Kontaggd se trääde. Unn in der derzeidische Laache isses nadierlich e Vordääl, wammer sich midd dem ganze wirduelle Gedöns gudd auskennt. Iwwrischends iss ään Problem, wo vor kurzem noch schwäär Konjunkduur gehadd hadd, momentaan ziemlich in de Hinnergund geriggd: de Kommbjuuder-Virus. So duun sich die Schwerpunkte verschiewe.

Awwer all die Leid, wo ihr soziale Kontaggde nidd nur iwwers Nedds abwiggele, greife jedds widder effder zum gudde alde Telefon. Wo joo aach nidd umsuschd amtlich Fernprech-Aanlaach hääscht und doodemidd de vorgeschriewene Abstand garandierd. Es iss awwer aach ebbes völlisch anneres, ob mer e droggeni E-Mail abschiggd odder ob mer sich midd rer menschlich Stimm am annere Enn vunn der Leidung unnerhald. Weil mer an der Stimm aach die Stimmung vunn seinem Gesprächspartner middkried. Unn doo iss e Emoji in rer E-Mail nur e Notleesung.