Mundart-Kolumne Ganz winzische Viecher
Kaum hat sich es neije Johr allmählich inngelääbd, doo gebbs schunn die Hitlischde midd de Klasseprimusse in de äänzelne Kaddegorieje. Mir lääwe joo in rer Wettbewerbsgesellschaffd, unn doo iss es sogenennde Ränking schwäär beliebt.
Unn mer steht nur im Rampelicht wammer ganz owwe uff soorer Lischd steht. Doo gebbds dann die Blume des Jahres odder sogar de Vochel des Jahres. Wobei se fier dies Johr widder emool e ganz annerer gewählt hann, nämlich die Turteltaub. Geeje so e romandischi Marke hadd nadierlich unserääns kää Schangse. Das iss so ähnlich wie midd denne Katzevideos, wo sich manche nimmeh inkrien vor Entzügge. Je klääner desdoo niedlicher.
Das hadd sich offenbar aach die Vereinischung vunn de Mikrobiologe gesaad, wie se e Winzling midd dem unaussprechliche Noome Myxococcus xanthus zur Mikrobe des Johres gewählt hann. Uff so ebbes muss mer erschd mool kumme. Das Biest iss sogar so klään, dassmers noch nidd emool sieht. Weil so e Mikrobe joo nur aus ääner Zell bestehn duud. Das fallt dann unner Minimalismus unn der leid bekanndlich voll im Trend.
Awwer sie duun sich midd annere sesammeschliese, wahrscheins weil se sich doch einsam fiehle. E Unnerabteilung vunn de Mikrobe sinn joo die Baggdeerieje, die wo allerdings nidd direggd als Sümmpadieträcher bekannd sinn. Das leid awwer doodraan, dass die gääre midd de Bazille unn de Vire verwechselt werre. Das sinn die, wo fier de Schnubbe, de Huuschde unn Schlimmeres verantwortlich sinn. Desweeje saad mer joo aach, wann die Fregg änner erwischt hadd, dasser uff alle Vire erummkrawwelt. Ach iwwrischens, das hann ich ganz vergess: Die Blume des Johres iss e Sumpf-Flännzje midd dem scheene Noome Fieberklee.
