Awweile um die Johreszeit, wo die Aktiwitääde widder ins Freie verleed werre, iss in de umlieschende Gemeinde e schwääri Konkurrenz im Gang. Wer doo es dollschde Großereischnis uff die Bään stelle duud. Am beschde macht sich immer irjendebbes Histoorisches, doo kammer nix verkehrt mache. Zum Gligg simmir hie in der Geeschend midd Geschichtsträchtischem gudd versorscht, bis in die Urzeit ninn.Unn dann muss das ganze Iewent vor allem ääns sinn: spektakulär. Das beliebte Wort iss nämlich aach historisch unn iss abgeleit vun dem ladeinische Ausdruck spectaculum. Was sovill hääsche soll wie e Schauspiel. Also ebbbes, was mer sich gääre aanguggd unn wo mer ganz groose Aue macht. Unn meischdens aach noch weit de Mund uff, weil mer vunn dem Aanbligg so baff iss. Also uff Neideitsch das was mer e richdischer Hingugger nennt. Besunnerschd wann die Aktööre noch imme Koschdüüm drinn stegge. Aadlische ausem Barogg zum Beispiel odder vunn noch friejer e Haufe Reemer, wo sich midd de Kelte verklobbt hann. Unn zur Zeit ganz besunnerschd beliebt iss joo es Middelalder. Doo gebbd magisch verhext unn gezaubert, gebauchtanzt unn feiergeschluggd, dasses emm vum Gugge ganz schwindlisch werrd. Bleed iss nur wanns drause räänt, weil dann die ganze Ridder roschdisch werre. Uff jede Fall schwebt iwwer allem e Hauch vun Zirkus, Simsalabim unn Mummeschanz, fascht wie uffem Kinnergebordsdaach. Odder awwer es geht zu wie in der Arena. So wie vor korzem im Betzetal, wo se e deitschi Määschderschaffd im Profi-Boxe ausgetraa hann. Richdisch leif unn in Farwe. Unn imme Ring, der wo awwer viereggisch war. Ganz noo dem Motto: Die Boxer vunn der Meisterklasse verhaue sich zu Kleistermasse.