Wääschde noch, sellemools …

St. Ingbert · Näägschd Johr soll joo an de hunnerdschde Todesdaach vunn unserm Mooler Weisgerber ausgiebisch unn würdisch erinnert werre. Die Formulierung, dass die Veranschdaldunge schunn ihr Schadde vorauswerfe, verkneif ich mer liewer.

Weil mir joo all wolle, dass doo vill Licht debei iss, meeschlichst das vunn der Effendlichkääd.In dem Sesammehang fallt emm uff, dass momentan iwwerhaupt die Riggbligge uff äldere Zeide schwäär im Schwang sinn, meischd midd wehmiedische Gefiehle, vunn denne, wo se noch erlääbt hann. Vor allem ausgeleest vunn alde Foddos, wo bei der Geleechenhääd aus der Versenkung zum Vorschein kumme. Zum Beispiel in denne Ardiggel iwwer die leidvolle Erfahrunge währendem leddschde Kriech in der "Rote Zone" hie im Kreis. Unn es iss wichdisch dass so ebbes nidd verlor geht, weil de noowachsende Generazioone die schwarz-weiße Doggumende schunn faschd widder exodisch vorkumme.Vor kurzem hannse hie - aanlässlich vumm Gebordsdaach vunn der Frau Biedermann - e Loblied uff de alde Karlsberschsaal gesung. Der wo joo zu der Zeit werklich e kuldureller Leuchtturm vunn Dengmerd war. Vunn weeje seiner Ausstrahlung. Ich hann doo derfe selwer mei erschde zaachhaffde Schridde uff de Bredder unnernemme. Wammer sich die Bilder vunn doomools allerdings so anguggd, doo kammer manchmoo die Gesichder garnidd richdisch erkenne. So iss bei denne Veranschdaldunge gequalmt worr. Was em heid schunn faschd komisch vorkummt.Awwer als Teaaderspieler war mer nadierlich froh, wann doo bei de Requisidde e Zigaredd debei war, am beschde noch midd Fixfeier. Mer hadd se brauche nidd emool in echt se raache. Awwer mer hadd weenischdens gewisst wohin midd seine Hänn.

Meistgelesen
Neueste Artikel
Zum Thema
Aus dem Ressort