Unn midd Sache wo krawwele duun die joo heit e Groosdääl vum Programm bestreide. Im edle Wettstreit vunn de Gäggs unn schrääche Tön um das Objekt der Begierde: die renommierde Dengmerder Pann. Die Broodpann bildet joo, wie die Volkskundler wisse, zusamme middem Schierhooke unn em Debbischklobber es traditionell saarlännische Trio an bevorzuchde Tatwerkzeiche im Konfliktfall. Awwer ganz so schlimm werrds bei der Veraanstaldung nidd kumme. Weils sich joo Pann aach uff Fann reimt, was englisch iss unn sovill wie Spass hääscht. Unn der iss joo heid generell im Service midd drinn. Es gebbd de Urlaubsspass, de Badespass. Unn sogar das, was fier manche Leid midd Stress verbunn iss, iss fier annere de Inkaafsspass. Unn im Fernsehn sahn se sogar vor jeder zwädd Sendung: Viel Vergnügen. Das misse die schunn vorher saan, dass mer genau wääs, awweile werrds luschdisch. Middlerweil iss das awwer so inflazionäär im Gebrauch, dassmer sogar in Sidduazioone, woos eejer noo Huddel aussieht, gesaad kried: Na dann, vill Vergnische!.

Die Dengmerder Kläänkunschdwoch iss awwer primär gar nidd so uff Frohsinn unn Amüsemang gepolt. Weil doo joo meischt zwische de Zeile die kriddische Unnertöön die Owwerhand gewinne. Mer kinnd sogar saan, doo zeid sich es Kabarett vunn seiner Schokoladeseid. Weil doo so einisches durch die Kakao gezooh werrd, was emm an de geejewärdische Verhältnisse nidd so richdisch schmegge duud.