Awwer nää, im Ernscht - bis dass mer im September zu dem staatsbürjerliche Akt, mit der makabre Bezeichnung Urnegang schreite, iss joo noch e bissje hin. Vorher kammer sich als Lokalpatriot noch an rer annere Abstimmung beteilische. Doo werrd nämlich es scheenschde Naduurwunner in ganz Deitschland gesucht. Unn doo steht Dengmerd midd seinem Wahrzeiche, em Groose Stiwwel uff der Lischd midd druff.

Dass das steinerne Denkmal uffem Kobb steht, hadd joo sicher kää unnerschwellisch simboolischi Bedeudung. Unn iss insofern ganz praggdisch, dass mer doodraus gudd e Logo midd rer lang Nas mache kann. Unn dann iss so e Stiwwel joo aach e Trinkgefääs gewähn, wo unser Urahne schunn ihr Gerschdesaft unn noch friejer wahrscheins de Meet draus gedrunk hann. Wammer das Dengmerder Naduurwunner besischdische will, muss mer allerdings seerscht ziemlich steil de Bersch enuff stiwwele.

Awwer jedds iss e paar Leid uffgefall, dass die Auswerdische, die wo vunn der Attrakzioon aangezoo werre, Huddel hann fier die iwwerhaupt se finne. Wobei joo nidd klar iss, ob die Dengmerder selwer all so genau wisse, wie mer doo nuff kummt. Desweeeje sollt mer besser e paar Schilder hinstelle. Dass nidd die Leit am Enn geströmt kumme unn sich hie in unserm üppische Waldrevier noch verfranse.

Wem der Bersch bei der Hidds zu stressisch iss, der waard bis zum Herbschd. Doo heischt dann die Dewiese: feschdes Schuhwerk empfohlen. Am beschde Stiwwele.