Saan se mool, was soll mer dann vunn dem doo Wedder halle. Geht ihne das eewische ruff unn runner aach so uff de Keks. Ei, so ebbes macht emm doch kreislaafmääsisch total ferrdisch. Die erschde Käddsjer hann schunn geblieht unn dann uff äämool muss mer widder es Eis am Audo runnerkraddse. Die arme Veschelcher, wo schunn versuchsweis am Tirilliere ware, duun sich de Berzel verfriere. Unn die Zuchveschel, so hann ich gelääs, die kratze graad widder die Kurv unn unn maches wie die Rentner, wo im Süde iwwerwindere. Mer iss de ganze Daach so schlabb, dassmer direggd e Verein gründe kennt zur Wiederinfiehrung des Winterschlafs. Unner der Dewiese: Am beschde wegge ner mich mool nochmool so Midde April, doo gugge mer dann weider. Uff der anner Seit muss mer nadierlich aach saan: Wedder iss joo eichendlich immer, egal wie grusselisch. Unn das iss dann joo aach gudd, weil mer, wann emm partout nix anneres meh infallt, dann weenischdens e Thema hadd fier se sprooche odder se schreiwe.Vielleicht simmer joo aach nur verwehnt, weil mir uns nidd an de reaale, sondern eejer meh an de gefiehlde Temberaduure orientiere. Unn doo hammirs liewer muggelisch warm unn gemiedlich. Awwer hie in unserer Geeschend hammirs joo noch gudd getroff, wammer sich die Wedderkaard anguggd unn sieht was in annere Reeschioone manchmool so abgeht. Vielleicht leids doodraan, dass mir hie kulinarisch so e Hochkulduur hann unn immer de Teller leer esse. Unn hann sie gewisst, dass es Saarland bundesweit in de Nachrichde unn de Pressorgane es Maß aller Dinge iss. Ei joo, wann irjendwoo e Kaddaschdroof iss, doo heert mer dann de Sprecher saan: E Öltebbisch - dobbelt so groß wies Saarland.