Ei gebbds dich dann aach noch?

Gell, das hann sie bestimmt aach schunn erlääbt, dass mer noo Johre zuume Klassetreffe inngelaad werrd. Doo iss es dann schunn e makabrer Zufall, wann gleichzeidisch in Dengmerd es jährliche Oldteimertreffe annonciert werrd. Vor allem wann uff der Innlaadung zu der Sammelbeweeschung so beängschdischende runde Zahle vorre draan stehn

Gell, das hann sie bestimmt aach schunn erlääbt, dass mer noo Johre zuume Klassetreffe inngelaad werrd. Doo iss es dann schunn e makabrer Zufall, wann gleichzeidisch in Dengmerd es jährliche Oldteimertreffe annonciert werrd. Vor allem wann uff der Innlaadung zu der Sammelbeweeschung so beängschdischende runde Zahle vorre draan stehn. Unn mer kann dann nur hoffe, dass mer als älderes Semeschder aach vun der Wertsteicherung als Museumstigg profidiert. In dem ääne wie in dem annere Fall werrd joo vor der Begutachdung es Schassi vorher e bissje uff Hochglanz gebrung. Unn nidd bloos die Audos werre fachmännisch uff jinger friesiert. Es muss joo nidd glei jeder siehn, dass de erschde Lagg schunn lang ab iss. Die Abituuriende vun heid, wo jedds de Stress iwwerstann hann, misse sich doodriwwer zum Gligg noch kää Gedange mache. Unn bis zum Johr 2059 isses joo noch e bissje hin. Awwer wammer sich das iwwerleed, wie die Zeid vergeht, doo kanns emm schunn ganz scheen schwindlisch werre. E ähnlischer Schogg kried mer, wammer zirka 50 Johr später sei Klassekameraade nochmool se siehn kried. Woobei mer nidd wääs, was emm doo meh verschregge machd. Wie die sich all verännert hann odder dass mer uff äämool merkt, wie ald mer selwer worr iss. Was emm bisher eichendlich gar nidd uffgefall wär. Bei soome Treffe kumme joo leicht e paar Johrhunnerde sesamme. Unn wammer es Bruddogesamtgewicht sesammezählt, iss das seid doomols ziemlich in die Heeh geschnerrd. Unn das noch bevor se iwwerhaupt die Vorspeis serviert hann. Am scheenschde sinn joo die uffmundernde Begriesunge: Ei lääbschd du aach noch! Was soll mer doodruff groos saan? Am beschde: Ei nadierlich - unn wie!

Meistgelesen
Neueste Artikel
Zum Thema
Aus dem Ressort