Awwer bitte midd Schleifche

Die Rohrbacher mache mool widder de Aanfang. Am erschde Adwent gehts noo dem lange Aanlauf endlich richdisch los midddem Truuwel uff de Weihnachtsmärkt. Unn bei der Geleechenhääd hadd sogar unser Landesmudder perseenlich die Männer zart draan erinnert, dasse ihr Geschenke diesmool rechtzeidisch innkaafe sollde. Unn nidd erscht am Heilische Oowend morjens noch uff de leddschde Drigger

Die Rohrbacher mache mool widder de Aanfang. Am erschde Adwent gehts noo dem lange Aanlauf endlich richdisch los midddem Truuwel uff de Weihnachtsmärkt. Unn bei der Geleechenhääd hadd sogar unser Landesmudder perseenlich die Männer zart draan erinnert, dasse ihr Geschenke diesmool rechtzeidisch innkaafe sollde. Unn nidd erscht am Heilische Oowend morjens noch uff de leddschde Drigger. Weil an dem Daach meischt weeje der Uwweraasch sowieso e gewissi Heggdigg ausbreche duud. De Groosdääl vunn der Freid bei der Schenkerei ergebbd sich awwer meischdens graad durch das ganze Drummerumm vorher. Unn bevor die Geschenke dann streng geheim versteggeld werre, doo werre se seerschd mool noch meeschlichst originell verpaggd. Bei der Volkshochschul hadds doodefier jedds sogar e eichener Fortbildungskurs gebb. Die Mitarbeiderinne In de Geschäffde, die hann so e Kurs nidd needisch, weil die joo tradizionell die wersierdeschde Verpaggungskinschdler sinn. Nur gebbds dann nadierlich uff der Empfängerseit es Problem, dass die Geschenke so krisesicher verpaggd sinn, dass mer an die garnidd draankummt, ohne dassmer midd rooher Gewalt das ganze raffinierde Kunschdwerk verrobbt. So isses zum Beispiel meinem Freind Schorsch an de voorische Weihnachde gang. Doo hadd er e Päggelche geschenkt kried, wo midd so rer Art Seemannsknoode sesammegeknoddelt war. Dasser sich bis dies Johr noch nidd getraut hadd, fier das gudde Stigg uffsemache. Unn auserdemm, so saad er, war die Verpaggung so exklusief, dass die wahrscheins vill wertvoller war wie das was drin war. Doo kammer nur hoffe, dasses Haltbarkäädsdatum noch nidd abgelaaf iss, wanners an denne Weihnachde endlich uffmacht.