1. Saarland
  2. Saarpfalz-Kreis
  3. St. Ingbert

Mundart-Kolumne Die Atzel für St. Ingbert

Mundart-Kolumne für St. Ingbert : Nidd uff de Kobb gefall

Ich wääs nidd, wies Ihne geht, awwer kinne Sie Noome aach so schlecht behalle? So ebbes kann emm schwäär in die Bredullje bringe, vor allem wammer jemand noo längerer Zeit widder treffd, denne wo mer eichendlich em Noome noh kenne missd.

Mer stodderd dann e bissje erumm unn saad: Ich wääs jedds nidd genau, wo ich Sie hinn duun soll. Unn mer kummt sich debei ziemlich bleed vor. Vor allem weils dem Geejeiwwer genauso geht. Also, dass mer demm bleed vorkummt.

Awwer es iss joo heidsedaachs aach alles vill schwierischer. Die Noome vunn der Verwandschaffd grääd mer joo zur Not noch sesamme. Awwer mer muss sich joo aach noch die ganze exoodische Noome vunn de ganze Promminende unn de Royals merke. Falls mer mool im Fernsehn imme Quiz middmache missd.

Unn dann frood mer ganz verzweifelt sei Fraa, wo nääwedraan huggd unn aach guggd: Das war doch die Dings, die Ääh, die …, wie häscht se dann gleich? Doo leid emm die richdisch Antwort meischdens uff der Zung. Wo se awwer nix niddsd, weil sich es ganze Drama im Kobb abspielt. Odder besser gesaad im Herrn.

Wo sosesaan de Speicher iss, wo mer all das gebungerd hadd, was mer sich hadd merke wolle. Awwer wammer bedenkt, wies uffem Speicher meischdens aussieht, isses eiegendlisch kää Wunner, dassmer das was mer sucht, nidd gleich parat hadd.

Midd e paar Triggs kinnd mer sich awwer behelfe, saan die Fachleid. So soll mer äänfach es Alfabeed der Reih noo durchgehn. Bis dann de Grosche widder falld. Wann das aach nix helfd, kammer heid de Kurs bei der VHS iwwer Gedächtnistraining besuche. Dann passierts aach nimmeh, dass em jemand uff der Stroos e Mikro vor die Nas halt unn frood: Was halten Sie als Außenstehender von Intelligenz?