Die Umgangsforme werre joo heidsedaachs immer loggerer, ums mool dezent aussedrigge. Was joo aach manchmal besser iss als wie zu steif unn verkrampft. Awwer das bringt nadierlich neije Probleeme midd sich, zum Beispiel in manche Sidduuazioone, wo mer nidd glei wie die Wudds im Garde midd der Dier ins Haus falle will. Das fangt dann schunn bei der Kontaktuffnahme aan: wie sollmer jemand aanschwaädse, ohne dass der sich uff de Schlibbs geträäd fiehlt? Mer wills joo aach nidd so mache wie in manche Meedije, unn jeeder wo emm vor die Flint kummt, glei gnaadenlos duuze. Unn e herzhaffdes: Ei Kolleesch, wo hängts dann? iss joo aach nur e Notleesung. Wann der Betreffende weenischdens e blauer Kiddel aanhadd, doo saad mer dann eewe äänfach Meischder zu dem. Mei Knecht odder mei Maad, das beniddsd mer joo heegschdens noch in der Familie odder bei de ganz Klääne wo sich nidd wehre kinne. Unn was kried mer serigg? E munderes: Äh, Alder, was guggschde dann so? Unn zu mir hadd neilich änner, wo sich mei komblizierder Noome nidd hadd kinne merke am Telefon gesaad: Saan se mool, Herr Dings... Ganz friejer, in de alde unn ehrwirzische Zeide unn unner de hochherrschaffdliche Verhältnisse, doo hadds sogar noch die gnäädisch Fraa gebbd. Awwer midd geehrt unn hochachtungsvoll tituliert mer joo heid bloos die Leid, midd denne wo mer nur noch schriftlich verkehrt. Die Eesterreicher hanns doo äänfacher: bei denne hadd jeder middeme Ie-Kuh von knapp iwwer achzisch schunn de Titel Professor. Reschbeggdspersone gebbds nur noch selten, seit de Reschbeggd vum Aussterwe bedroht iss. Doo kanns dann passiere, dass im Brief an die Schul steht: Sehr geehrter Herr Lehrkerper!