Mool prinzipjell geschwäddsd
Prinzipjell iss joo nix degeeje se saan, wann e Mensch Prinzipje hadd. Ganz im Geejedääl! Odder annerschd gesaad: Grundsätzlich geniese joo Leid, wo heidsedaachs noch Grundsätz hann, definitief e hohes Aansehn. Unn das midd Recht. Er iss seine Prinzipje treu, saad mer vunn so jemand dann voll Bewunnerung. Awwer wie alles im Lääwe kammers doodemidd nadierlich aach iwwertreiwe
Prinzipjell iss joo nix degeeje se saan, wann e Mensch Prinzipje hadd. Ganz im Geejedääl! Odder annerschd gesaad: Grundsätzlich geniese joo Leid, wo heidsedaachs noch Grundsätz hann, definitief e hohes Aansehn. Unn das midd Recht.Er iss seine Prinzipje treu, saad mer vunn so jemand dann voll Bewunnerung. Awwer wie alles im Lääwe kammers doodemidd nadierlich aach iwwertreiwe. In soome Fall schwäddsd mer vunn Prinzipje-Reiderei. Unn weil das nidd so aarisch beliebt iss, iss die Disziplin noch nidd olimpisch. Mer soll joo generell uff allem, was kää Päärd odder weenischdens e Steggepäärd iss, nidd unneedisch erummreide. Generell ist iwwrischens so ebbes wie es Geejedääl vun prinzipijell. Uff gudd deitsch hääschd das dann: im allgemeine. Odder aach gemäänerhand. In de effendliche Diskussioone heerd mer die Kontrahennde als saan: Im allgemeine hann sie in der Sach vielleicht sogar recht, awwer prinzipjell sinn sie doch uffem Holzwää.
Jedds frood sich de geneischde Leser langsam, was ich midd meinem Gequassel doo eichendlich saan will. Ei, ich wollt ihne nur mool demonschdriere, wie mer sich selwer unn aach annere Leid midd ganz hundsgewehnliche Werder manchmool wurres mache kann. Wammer se sich nur lang genuch uff der Zung zergehn losst. Desweeje gebbds aach immer widder Nooschub an ganz neije, unverbrauchde Werder.
So zum Beispiel denne scheene plassdische Ausdrugg zeitnah. Seerschd hadd mer so ebbes joo nur in hochgestochene Gespräche geheert: Wann du mich awweile nidd zeitnah in Ruh loscht, doo kannschd du awwer mool ebbes erlääwe. In unserm Dialeggd heerd sich das awwer noch vill bluumischer aan. Doo hääscht das schlicht unn äänfach: Mach dabber, dass de Land gewinnscht!
