Hann Sie zufällisch Inderesse amme Gefängnis? Relatief abgewohnt, awwer solied gebaut unn in zendraaler Laache. Also nidd zum Eichenbedarf, um Himmels wille, das wolle mer joo nidd hoffe. Awwer noodemm dass demnäägschd in Dengmerd de Vollzuuch nimmeh vollzooh werre soll, doo will die Juschtiez es hiesische Gefängnis tatsächlich verkaafe. Unn wies scheint hadd die Stadt schunn e Au uff die Immobilje geworf. Sie sinn awwer noch am Iwwerleeje was mer doo Sinnvolles kinnd eninnseddse, wo aach themaadisch zu der Lokalitääd passe duud. Ewenduell e schweedischi Gardinefabrik, e biodinnaamischer Muschderbetrieb namens Keim-Zelle odder die Galerie Kunschd im Knaschd. Es iss nadierlich nidd so, dass iwwer Naachd bei uns de Edelmuud ausgebroch wär, unn an Bullese, wie mir vun der Unnerwelt liebevoll saan, kemmeh Bedarf bestehn werrd. Awwer iwwer allem schwebt halld de Rotstift. Unn doo werre nidd bloos Stroofaanstalde umfunkzioniert, nää sogar in einische Kerche zieht Profanes inn. Was mer vun denne zwää heid needischer brauche, doodriwwer dischbediere se noch. Es iss halt alles im Umbruch in denne Daache unn vill vun dem wo mer gedenkt hädd, es halt eewisch, geht langsam awwer sicher die Bach enunner. Inderessant wär nur mool fier se erfahre, wo uff äämool das Geld herkummt, wo se dooodefier in die Hand nemme wolle. Awwer vielleicht duunses aach gaschdronomisch vermarkde. Im Fernsehn hadds doch sogar mool so e Serie gebb: Café Meineid. Dann steht uff der Speisekaard jede Daach e sarlännisches Landes-Gericht. Unn wann de Gascht im Knascht nidd hemmfind weeje gudder Fiehrung des Lokals, doo ruft de Wert noo der Sperrstunn: Auch der Gast macht sich strafbar.