Uff de Mund gefall
Ei gugge mool doo, hann ich zu de erschde Sunnestrahle gesaad, sieht mer eich aach mool widder. So langsam hebt sich de Grauschleijer, wo de Winder uff unser Gemied geleed hadd. Unn iwwerall heerd mer: es werrd awwer aach ball Zeit. Kalendarisch iss im März eichendlich schunn Friehjohr, wo de Bauer bekanntlich die Päär anspannt. Allerdings duud mer sich morjens noch edle Kerperdääle abfriere
Ei gugge mool doo, hann ich zu de erschde Sunnestrahle gesaad, sieht mer eich aach mool widder. So langsam hebt sich de Grauschleijer, wo de Winder uff unser Gemied geleed hadd. Unn iwwerall heerd mer: es werrd awwer aach ball Zeit. Kalendarisch iss im März eichendlich schunn Friehjohr, wo de Bauer bekanntlich die Päär anspannt. Allerdings duud mer sich morjens noch edle Kerperdääle abfriere. Weil de Winder, so die Prognose, nidd freiwillisch es Revier raumt, unn als noch doodegeeje ankämpft.Wo aach gekämpft worr iss, das war am Samschdaach bei dem groose Kampfsport-Iewent in der Ingobertushall, was de Dengmerder Karate-Club organisiert hadd.
Awwer aach in der freie Wildbahn duun sich anscheinend die Nachwuchs-Kampfkinschdler tummele, noo dem was mer so in der Zeidung lääst. Wobei die midd de Sportler nidd se vergleiche sinn. Weil die joo die edle Kunscht der Selbschdverteidischung noo strenge Reechele praggdiziere, dass sich kenner ernschthaft verleddse duud. Im Geejesadds zu unsere Schule, wo jedds sogar midd klääne Behälder ausgestattet werre, wo mer ausgeschlaane Zähn drin uffbewahre kinnd.
Wie ich das gelääs hann, doo iss mir ball die Siessschmier vum Teller gehubbst. Unn mer kann sich bissische Kommentare kaum verkneife. Zumal die Dinger sinnischerweis aach noch Boxe heische.
