Seeluffd odder Heejeluffd

Seeluffd odder Heejeluffd

Die Ferijezeit iss joo jedds als mool widder rum. All die wo im Urlaub uff Achse ware, die hann joo vor der Entscheidung gestann: fahre mer nuff in die Berje odder runner an die See. Es iss ball so ähnlich wie beim Wedder, wo sich joo aach, weenischdens teeoreedisch, Hoch unn Tief abwechsele solle. Unn mer saad joo aach: sounnsovill Heejemeeder iwwerm Meeresspischel

Die Ferijezeit iss joo jedds als mool widder rum. All die wo im Urlaub uff Achse ware, die hann joo vor der Entscheidung gestann: fahre mer nuff in die Berje odder runner an die See. Es iss ball so ähnlich wie beim Wedder, wo sich joo aach, weenischdens teeoreedisch, Hoch unn Tief abwechsele solle. Unn mer saad joo aach: sounnsovill Heejemeeder iwwerm Meeresspischel. Wammer sich dann fiers Meer entscheide duud, muss mer widder iwwerleeje: eejer in nördlicher Richdung odder doch - weejem Wedder unn de Finanze - liewer in südliche Gefillde. Awwer de ganze Daach in der Sunn bruzzele iss aach nidd jedermanns Sach. Wo die Haut dann trotz Schutzfaktor zehn am Enn vum Daach middem Abendrot konkurriere duud. Also, wer die Hidds unn es exoodische Esse nidd verdraad, der fahrt am beschde in die Berje. Es muss joo nidd glei so hoch enaus sinn wie de Dengmerder Alpinist Patrick Klemmer, der wo im Himalaja der Welt uffs Dach gekraxelt iss. Unn doo fladdert jedds e Wimpel middem Dengmerder Wappe.Nadierlich derf mer doodebei kää Heejeangschd hann wie mei Freind Schorsch. Wie se midd seinem Verein e Ausfluuch noo Owwerbaiern gemacht hann, doo hannse ihne als uffgezooh. Wie se doo middem Bus so hoch enuff gefahr sinn, dass mer kaum noch beim Jodele es Echo geheert hadd, doo hannse gestiwwelt: Gugg doch mool noo unne, wie scheen doo die Landschaft iss. Doo hadd er nur gemennd: Ei doo wär ich joo besser doo unne geblieb unn hädd geguggd wie scheens doo owwe iss. Uff der anner Seit iss er awwer sicher, dass er mool in die Himmel kummt. Doo kinnds awwer sinn, dasser doo Probleme kried, wanner nidd schwindelfrei iss. Awwer er hadd gemennd, doo hädd er joo dann Flischel.