Mer muss joo saan, manchmool isses ganz gudd, dass sich die Zeide geännert hann. Wammer bedenkt was das sellemools fiers Maria unn de Joseph fier e Uwweraasche unn e Uffwand war, wie die sich hann misse uff de Wää mache. Sie erinnere sich sicher noch dunkel an die Weihnachtsgechicht, wo em Kaiser in Rom ingefall iss, es wär mool e guddi Idee, dass jedermann sich schätzen ließe, ein jeglicher in seiner Stadt. Wann bei uns im näägschde Johr widder so e ähnliches Groosprojeggd aansteht, wo se es Volk zähle wolle, doo kumme die ganz kunnefreindlich sogar ins Haus. Das muss mer denne hoch aanrechne. Apropos - die brauche joo heidsedaachs nur noch ein klääner Prozentsadds werklich se zähle, de Reschd duun die dann hochrechne. Also iss das Ganze doch eejer widder wie friejer, woose das joo aach e Schätzung genennt hadd. E paar Pessimischde beferchde sogar, das bei der Aktion Pi mool Daume erauskummt, dass mir am Enn garnidd so vill Bundesbürscher sinn, wie se bisher immer behaupt hann. Doo misse dann die Stadisdigger bei ihre Berechnunge, wos immer hääscht: pro Kobb der Bevelgerung, äänfach in Zukunft e paar Kebb weglosse. Mei Freind Schorsch der hadd sich schunn voreilisch gefreit, dasser dann demnäägschd interwjuud werrd. Doo kind er denne awwer mool sei Meinung geije, dass denne die Ohre klingele. Unn das wär gudd, dass das mool an die Effendlichkääd käm. Erschdens, hann ich gesaad, is das geheim unn dann wolle die nix wisse iwwer dei Aansichde, die inderessiere sich nur fier dei Verhältnisse. Unn im iwwrische iss das umgekehrt wie sunschd, woomer joo besser de Mund halt. Wammer in dem Fall awwer die Aussaache verweigert, doo macht mer sich sogar stroofbar.